Хөрөнгө битүүмжлэх болон хураан авах, худалдан борлуулах ажиллагааг зөвшөөрөөгүй бол хуульд заасан хугацааны дотор гомдол гаргана

• Өнөөдөр, 17:55
|
• 12

Шийдвэрийн дугаар: 2025 оны 01 дүгээр сарын 10-ны өдөр, 210/МА2025/00096

Шийдвэрийн төлөв: Хүчин төгөлдөр болсон.

      Санамж: Энэхүү тойм нь шүүхийн шийдвэрийг орлохгүй бөгөөд олон нийтийг мэдээллээр хангах зорилготой болно.

       “А” ХХК нь Н байгууллагад холбогдуулан ашигт малтмалын тусгай зөвшөөрлийг битүүмжлэх болон хураан авах, албадан дуудлага худалдаа явуулах тогтоолыг тус тус хүчингүй болгуулах тухай нэхэмжлэлийг шүүхэд гаргасан байна.  

       Анхан шатны шүүх “хариуцагч Н байгууллагыг шийдвэр гүйцэтгэлийн ажиллагааг хуульд заасан журмын дагуу явуулсан гэж дүгнэн, нэхэмжлэгчийн “ашигт малтмалын тусгай зөвшөөрөл битүүмжлэх болон хураан авах, албадан дуудлага худалдаа явуулах тогтоолыг тус тус хүчингүй болгуулах тухай” нэхэмжлэлийн шаардлагыг хэрэгсэхгүй болгож шийдвэрлэсэн.

          Тус шийдвэрийг нэхэмжлэгч “А” ХХК эс зөвшөөрч давж заалдах гомдол гаргасныг шүүх хангаагүй.

        Учир нь нэхэмжлэгч нь дээрх ашигт малтмалын тусгай зөвшөөрлийг битүүмжлэх болон хураан авах, албадан дуудлага худалдаа явуулах тогтоолыг зөвшөөрөөгүй бол Шүүхийн шийдвэр гүйцэтгэх тухай хуулийн 44 дүгээр зүйлийн 44.3-т хариуцагч байгууллагын дээрх явуулсан арга хэмжээ, гаргасан шийдвэрийг зөвшөөрөөгүй бол уг арга хэмжээг гүйцэтгэсэн өдрөөс хойш, энэ тухай мэдээгүй бол олж мэдсэнээс 7 хоногийн дотор ахлах гүйцэтгэгчид нэхэмжлэгч нь гомдол гаргаж болно гэж, мөн хуулийн 44.4-т ахлах гүйцэтгэгч гомдлыг 14 хоногийн дотор шийдвэрлэж, тогтоол гаргана. Тогтоолыг зөвшөөрөөгүй бол хүлээн авснаас 7 хоногийн дотор ерөнхий шийдвэр гүйцэтгэгчид, ерөнхий шийдвэр гүйцэтгэгчийн шийдвэрийг хүлээн авснаас хойш 14 хоногийн дотор шүүхэд гомдол гаргана гэж тус тус заасан хугацааг хэтрүүлсэн” гэж дүгнэн, нэхэмжлэлийг хэрэгсэхгүй болгосон тул давж заалдах гомдлыг хангах үндэслэлгүй юм. 

   Шийдвэрийг бүтнээр нь үзэх холбоос:https://shuukh.mn/single_case/32787?daterange=2025-01-01%20-%202025-01-10&id=2&court_cat=1&bb=1

Хураангуйг бэлтгэсэн: Нийслэлийн Иргэний хэргийн давж заалдах шатны шүүхийн шүүгч Д.Дэлгэрцэцэг