ТЭЭВРИЙН ХЭРЭГСЛИЙГ ЭЗЭМШИГЧ УЧИРСАН ГЭМ ХОРЫГ НӨХӨН ТӨЛӨХ ҮҮРЭГТЭЙ

• 2023-09-20, 16:03
|
• 941

            Шийдвэрийн дугаар 210МА/2023/00148

            Шийдвэрийн төлөв: Хүчин төгөлдөр болсон

            Шийдвэрийн тойм: 2023.8.31 

Санамж: Энэхүү тойм нь шүүхийн шийдвэрийг орлохгүй бөгөөд олон нийтийг мэдээллээр хангах зорилготой болно.

            Г.Б нь Х банкны өмчлөлийн тээврийн хэрэгслийг жолоодож яваад осол гаргаж,  Д.Н-ийн өмчлөлийн автомашинд 2,605,000 төгрөгийн хохирол учруулсан. Д.Н нь автомашины өмчлөгч Х банкнаас 2,605,000 төгрөгийг төлүүлэхээр нэхэмжлэл гаргасан. 

            Х банк нь автомашины өмчлөх эрхийг зээлдэгч Т.Б, Б.Б нараас зээлийн гэрээний үүргийн гүйцэтгэлийг хангах арга болох фидуцийн гэрээгээр шилжүүлэн авсан боловч  машиныг  бодит байдалд Х банк биш, зээлдэгч Т.Б, Б.Б нар эзэмшиж ашиглаж байсан гэж маргажээ.

            Зээлдэгч Т.Б, Б.Б нар нь дээрх автомашиныг Х банкны нэр дээр бүртгүүлсэн хэдий ч өөрсдөө унаж, ашиглаж байсан бөгөөд машиныг тухайн өдөр осол гаргасан этгээд болох Г.Б-д шилжүүлэн өгчээ./ Жолоогоо шилжүүлсэн/ 

            Мөн Т.Б, Б.Б нар нь Х банктай “... тухайн автомашиныг эзэмшиж, ашиглаж байх хугацаандаа гуравдагч этгээдэд хохирол учруулбал үүнтэй холбоотой аливаа  нэхэмжлэлээс банкийг чөлөөлж, үүссэн үр дагаврыг хариуцахаар” тохиролцжээ.

            Зорчигч болон ачаа тээвэрлэх зориулалт бүхий тээврийн хэрэгслийг ашиглах явцад бусдын амь нас, эрүүл мэндэд хохирол учирсан буюу эд юмс нь эвдэрч, устаж, гэмтсэн бол тухайн тээврийн хэрэгслийн эзэмшигч учирсан гэм хорыг нөхөн төлөх үүрэгтэй байдаг. 

            Автотээврийн хэрэгслийн өмчлөх эрх заавал бүртгүүлснээр үүсдэггүй. Тээврийн хэрэгслийн бүртгэл нь өмчлөлийн харилцааг гэхээс илүүтэй автотээврийн хэрэгслээр ачаа, зорчигч тээвэрлэх үйл ажиллагаа болон ашиглалттай холбогдсон харилцааг зохицуулдаг. 

            Иймд Х банк нь осол гаргасан Г.Б-г өөрөө томилоогүй, түүнд тээврийн хэрэгслийг шилжүүлэн өгөөгүй, тээврийн хэрэгслийн шууд эзэмшил буюу хариуцлага Т.Б, Б.Б нарт байсан тул  шүүхээс Х банкийг  хариуцлагаас чөлөөлж шийдвэрлэжээ.

Шийдвэрийг бүтнээр харах цахим холбоос: 

https://shuukh.mn/single_case/26086?daterange=2023-01-13%20-%202023-01-13&id=2&court_cat=1&bb=1

Тоймыг бэлтгэсэн: Нийслэлийн Иргэний хэргийн давж заалдах шатны шүүхийн шүүгч Ш.Оюунханд