“Шүүхэд мэдээллийн технологи, шүүхийн үйлчилгээ, удирдлагын шинэ хэлбэрийг нэвтрүүлэх нэгдсэн бодлого”-ын баримт бичгийн талаар танилцуулга хийв

• 2022-12-13, 15:03
|
• 727

       Монгол Улсын Шүүхийн тухай хуулийн 71 дүгээр зүйлийн 71.1.11-д “шүүхийн Тамгын газрын үйл ажиллагаанд мэдээллийн технологи, шүүхийн үйлчилгээ, удирдлагын шинэ хэлбэрийг нэвтрүүлэх нэгдсэн бодлого батлах, хэрэгжүүлэх”, мөн хуулийн 74 дүгээр зүйлийн 74.1.6-д “шүүхийг дэвшилтэт техник, тоног төхөөрөмжөөр хангах нэгдсэн бодлого батлах, хэрэгжүүлэх” гэж тус тус заасан байдаг.

        Шүүхийн байгууллагад 1989 оноос мэдээллийн технологи нэвтрүүлж эхэлснээр шүүх, шүүхийн Тамгын газарт 20 гаруй систем, программ хангамж хэрэглэж байна. Гэсэн хэдий ч эдгээр системүүд нь хууль сахиулах бусад байгууллагын системүүдтэй уялдаа холбоогүй, тайлан, мэдээ гаргах боломж хязгаарлагдмал, гар ажиллагаа ихтэй зэргээр өнөөгийн шаардлагад нийцэхгүй байгаа тул зайлшгүй шинэчлэл шаардлагатай талаарх судалгаа байдаг.

        Шүүхийн ерөнхий зөвлөлийн даргын 2022 оны 02 дугаар сарын 9-ний өдрийн 24, 2022 оны 03 дугаар сарын 02-ны өдрийн 48 дугаар тушаалаар   шүүхийн байгууллагад мэдээллийн технологи, шүүхийн үйлчилгээ, удирдлагын шинэ хэлбэрийг нэвтрүүлэх нэгдсэн бодлого боловсруулах үүрэг бүхий “Ажлын хэсэг”-ийг Шүүхийн ерөнхий зөвлөлийн гишүүд, анхан болон давж заалдах шатны шүүхийн шүүгч, Улсын дээд шүүхийн Тамгын газрын дарга, анхан шатны шүүхийн Тамгын газрын дарга, Шүүхийн ерөнхий зөвлөлийн Ажлын албаны төлөөллийн бүрэлдэхүүнтэйгээр баталсан бөгөөд уг ажлын хэсэгт Нийслэлийн Иргэний хэргийн давж заалдах шатны шүүхийн шүүгч Г.Даваадорж ажилласан юм.

        Ажлын хэсэг бодлогын баримт бичгийн зорилго, зорилт, арга хэмжээ, шалгуур үзүүлэлтийг тодорхойлж судалгааг хийж, бүх шатны шүүх, шүүхийн Тамгын газраас саналыг авч, бодлогын төслийг хэрэгжүүлэх шийдлийн талаар мэдээллийн технологийн компаниудтай уулзалт хийж, нийт 12 удаагийн ажлын хэсгийн хуралдаан, 2 удаагийн олон нийтийн хэлэлцүүлгийг тус тус зохион байгуулсан.  

     Улмаар бодлогын төслийг Шүүхийн ерөнхий зөвлөлийн 2022 оны 12 дугаар сарын 7-ны өдрийн хуралдаанаар хэлэлцүүлж, 332 дугаар тогтоолоор “Шүүхэд мэдээллийн технологи, шүүхийн үйлчилгээ, удирдлагын шинэ хэлбэрийг нэвтрүүлэх нэгдсэн бодлого”-ыг баталлаа.

2022 оны 12 дугаар сарын 13-ны өдөр Нийслэлийн Иргэний хэргийн давж заалдах шатны шүүхийн шүүгч Г.Даваадорж тус шүүхийн шүүгч, ажилтан, албан хаагч нарт “Шүүхийн мэдээллийн технологи, шүүхийн үйлчилгээ удирдлагын шинэ хэлбэрийг нэвтрүүлэх нэгдсэн бодлого”-ын баримт бичгийн талаар танилцууллаа.