Давж заалдах гомдолд шийдвэрийг зөвшөөрөөгүй хэмжээгээр улсын тэмдэгтийн хураамжийг төлнө

• 2022-12-6, 09:34
|
• 558

Шийдвэрийн дугаар: 2022 оны 08 сарын 02-ны өдөр, 210/ШЗ2022/00629

Шийдвэрийн төлөв: Хүчин төгөлдөр болсон.

2022.11.16-ны өдөр, шийдвэр-хураангуй: дугаар 04

Анхан шатны шүүхийн шийдвэрээр иргэн Жигмэдээс 18,634,668 төгрөг гаргуулан “Тулга” ХХК-д олгож, үүргийн гүйцэтгэлийг барьцаа хөрөнгөөр хангуулахаар тус тус шийдвэрлэсэн, уг шийдвэрийг  хариуцагч Жигмэд бүхэлд нь эс зөвшөөрч давж заалдах гомдол гаргажээ.

Иргэний хэрэг шүүхэд хянан шийдвэрлэх тухай хуульд зааснаар шүүхийн шийдвэрт гомдол гаргаж байгаа этгээд шийдвэрийг зөвшөөрөхгүй байгаа хэмжээгээр улсын тэмдэгтийн хураамжийг төлөх үүрэгтэй. 

Хариуцагч Жигмэд шүүхийн шийдвэрийг бүхэлд нь эс зөвшөөрч давж заалдах гомдол гаргахдаа “18,634,668 төгрөг гаргуулахаар шийдвэрлэснийг зөвшөөрөхгүй байгаа” хэмжээгээр буюу 251,123 төгрөгийн улсын тэмдэгтийн хураамж, түүнчлэн хуульд зааснаар үнэлэх боломжгүй нэхэмжлэлд 70,200 төгрөгийг тус тус төлөх үүрэгтэй байв. 

Гэтэл тэрээр давж заалдах гомдол гаргахдаа улсын тэмдэгтийн хураамжийг дутуу буюу 78,950 төгрөг төлсөн байна.

Иргэний хэрэг шүүхэд хянан шийдвэрлэх тухай хуульд зааснаар улсын тэмдэгтийн хураамжийг хуульд заасан хувь хэмжээгээр төлөөгүй бол шүүх гомдлыг хүлээн авахаас татгалзах үүрэгтэй тул энэ үндэслэлээр хариуцагч Жигмэдийн гаргасан гомдлыг давж заалдах шатны шүүх хүлээн авахаас татгалзжээ. 

Санамж: Энэ хураангуй нь бүрэн гүйцэд шүүхийн шийдвэр биш бөгөөд түүнийг орлохгүй, зөвхөн шүүхийн шийдвэрийг олон нийтэд ойлгомжтой байдлаар мэдээлэн хүргэх зорилготой болно.

Хураангуй бэлтгэсэн: Нийслэлийн Иргэний хэргийн давж заалдах шатны шүүхийн шүүгч Д.Дэлгэрцэцэг