Хүү тохиролцоогүй зээлийн гэрээг заавал бичгээр байгуулахыг шаардахгүй

• 2022-10-14, 11:27
|
• 591

Туршилтаар

Хүү тохиролцоогүй зээлийн гэрээг заавал бичгээр байгуулахыг шаардахгүй

Шийдвэрийн дугаар: 210/МА2020/00901

Шийдвэрийн төлөв: Хүчин төгөлдөр болсон.

2022.10.07, шийдвэр- хураангуй 05

“Д” ХХК иргэн Батаас зээлийн гэрээний үүрэгт 20,000 ам.доллар буюу шүүхэд нэхэмжлэл гаргах өдрийн ханшаар тооцон 43,323,800 төгрөг гаргуулахаар шаарджээ.

Хэрэгт авагдсан баримтуудаар, “Д” ХХК-аас Батад 20,000 ам.доллар шилжүүлсэн бөгөөд шилжүүлгийн утгад “авлага үүсгэв” гэж бичсэн, уг мөнгөн хөрөнгийг Бат хүлээн авсан, буцаан төлөөгүй байгаа үйл баримт тогтоогдсон байна.

Иргэний хуульд зааснаар, хүү тохиролцоогүй зээлийн гэрээг заавал бичгээр байгуулахыг шаардаагүй, мөнгө буюу эд хөрөнгийг зээлдэгчид шилжүүлэн өгснөөр зээлийн гэрээг байгуулсанд тооцдог.

Түүнчлэн, зээлийн гэрээгээр зээлийг буцааж төлөх хугацаа тогтоогоогүй бол зээлдүүлэгчийн шаардсанаар түүнийг буцааж төлөх бөгөөд ийнхүү шаардсанаас хойш нэг сарын дотор зээлдэгч үүргээ биелүүлэхээр хуульд заасан.

Иймд, “Д” ХХК-аас “авлага үүсгэв” гэсэн утгатайгаар 20,000 ам.долларыг Батын өмчлөлд  шилжүүлснээр зээлийн гэрээ байгуулагдсан гэж үзэх тул зээлдэгч Батыг зээлийг буцаан төлөх үүрэгтэй гэж дүгнэн, 43,323,800 төгрөг гаргуулж, “Д” ХХК-д олгохоор анхан шатны шүүхээс шийдвэрлэжээ.

Уг шийдвэрийг эс зөвшөөрч “… зээл аваагүй, өөр үндэслэлээр мөнгийг шилжүүлэн авсан… байхад шүүх буруу дүгнэсэн” гэх агуулгаар гаргасан гомдлоор давж заалдах шатны шүүх хэргийг хянаад гомдлыг хангахгүй орхиж, шийдвэрийг хэвээр үлдээв.

Хариуцагч нь дээрх тайлбар татгалзлаа нотлох баримтыг шүүхэд гаргаж ирүүлээгүй, “авлага үүсгэв” гэсэн шилжүүлгийн агуулгаас үзэхэд дээрх 20,000 ам.доллар нь буцаан төлөгдөх ёстой мөнгөн хөрөнгө буюу нэхэмжлэгчийн тодорхойлсноор зээл мөн гэж давж заалдах шатны шүүх дүгнэжээ. 

Зээлдэгч нь өөртөө шилжүүлэн авсан мөнгийг буцаан өгөх үүрэгтэй. Гадаад валютын ханшийг нэхэмжлэл гаргах үеийн Монголбанкнаас зарласан албан ёсны ханшаар тооцон, 43,323,800 төгрөгийг “Д” ХХК-д төлөх үүрэгтэй гэж үзсэн анхан шатны шүүхийн шийдвэр үндэслэлтэй гэж давж заалдах шатны шүүх үзэв.

Магадлалыг бүрэн эхээр нь үзэх бол: https://shuukh.mn/single_case/23518?daterange=2020-01-01%20-%202020-09-29&id=2&court_cat=1&bb=1

Хураангуй бэлтгэсэн: Нийслэлийн Иргэний хэргийн давж заалдах шатны шүүхийн шүүгч Ш.Оюунханд