Туршилтаар: Худалдсан барааг худалдан авагчид хүлээлгэн өгснөө нотолж чадаагүй

• 2022-08-2, 14:49
|
• 915

Туршилтаар

Худалдсан барааг худалдан авагчид хүлээлгэн өгснөө нотолж чадаагүй 

          Иргэн Бор /иргэний нэрийг өөрчлөв/ нь С компанитай 2018 оны 05 дугаар сарын 25-ны өдөр Газрын тосны бүтээгдэхүүн зээлээр худалдах, худалдан авах гэрээ байгуулж, нэхэмжлэгч нь хариуцагчийн захиалгаар газрын тосны бүтээгдэхүүнийг хугацаанд нь нийлүүлэх, хариуцагч төлбөрийг төлөхөөр тохиролцсон байна. Уг гэрээний “хавсралт №2”   гэх баримтыг талууд  2018 оны 08 дугаар сарын 22-ны өдөр үйлдэж, 45,962,000 төгрөгийн үнэ бүхий 23,450 литр түлш нийлүүлэх,  үнийг нь  2018 оны 08 дугаар сарын 30-ны өдөр төлөх үүргийг хүлээж гарын үсэг зуржээ.  /хх 12-20/ 

              Нэхэмжлэгч нь 178,069,800 төгрөг гаргуулах үндэслэлээ  “2018 оны 08 дугаар сарын 16-ны өдөр 41,375,600 төгрөгийн 21,110 литр түлш, 08 дугаар сарын 20-ны өдөр 41,375,600 төгрөгийн 21,110 литр түлш, 08 дугаар сарын 22-ны өдөр 45,962,000 төгрөгийн 23,450 литр түлш нийлүүлсэн”, мөн алданги тооцох ёстой  гэж, харин хариуцагч “уг өдрүүдэд түлш аваагүй” гэж тайлбар гарган маргасан.

               Анхан шатны шүүх нэхэмжлэлийн зарим хэсгийг хангахдаа хариуцагч Бор түлшийг хүлээн авсан гэж үзсэн бол, давж заалдах шатны шүүх нэхэмжлэгч нь нэг удаагийн нийлүүлэлтийг л баримтаар нотолж чадсан гэж үзсэн. Худалдсан барааны үнэ шаардахын тулд уг барааг хүлээлгэн өгсөн гэдгээ нотлох шаардлагатай. (ИХ 243.1) 

              Хэрэгт байгаа зарлагын падаан гэх баримтад түлш хүлээн авагчийг иргэн “Бор” гэж бичсэн бичилт,  шатахууныг тээвэрлэсэн, хүлээн авсан жолооч нар, нэхэмжлэгч компанийн ажилтан зэрэг хүмүүсийн гэрчийн мэдүүлгийг харьцуулж үнэлэхэд нэхэмжлэгч нь 2018 оны 08 дугаар сарын 22-ны өдөр 45,962,000 төгрөгийн үнэ бүхий 23,450 литр түлшийг хариуцагчид нийлүүлсэн нь нотлогдож, харин  хариуцагч уг түлшний үнийг төлсөн гэж үзэх баримт хэрэгт байхгүй байна. Иймд давж заалдах шатны шүүхээс нэхэмжлэгч компанийн 2018 оны 08 дугаар сарын 22-ны өдөр нийлүүлсэн 23,450 литр газрын тосны үнэд нийт 45,962,000 төгрөгийг хариуцагч Б-ээс гаргуулахаар шийдвэрлэж, анхан шатны шүүхийн шийдвэрт өөрчлөлт оруулсан. 

Талуудын гэрээнд хугацаа хэтрүүлсэн хоног тутамд төлөгдөөгүй үнийн дүнгийн 0,3 хувийн алданги төлөхөөр заасан, хариуцагч нь 2018 оны 08 дугаар сарын 22-ны өдөр нийлүүлсэн түлшний үнийг 08 дугаар сарын 30-ны өдөр төлөх ёстой байсан боловч төлөөгүй байх тул алданги төлөх үүрэгтэй. Хуулиар алдангийн дээд хэмжээг 50 хувь гэж тогтоосон тул (ИХ 232.4) хариуцагчаас алдангид 22,981,000 төгрөг гаргуулахаар шийдвэрт мөн өөрчлөлт оруулав. 

Хэрэгт 2018 оны 08 дугаар сарын 16-ны болон 20-ны өдрийн “ШТМ зарлагын падаан” гэх баримтад түлш хүлээн авагчийг “О” ХХК гэж хариуцагчаас өөр этгээдийн нэр бичигдсэн байхаас гадна дээрх гэрчүүдийн мэдүүлэгтэй харьцуулан үзэхэд нэхэмжлэгч эдгээр өдрүүдэд иргэн Борд шатахуун нийлүүлсэн гэдгээ нотолж чадаагүй байна. Иймд нэхэмжлэлийн энэ хэсгийг хэрэгсэхгүй болгосон.  

                                                   Уг шийдвэр хүчин төгөлдөр болсон. 

Шийдвэрийн бүрэн эхийг дараахь холбоосоор үзнэ үү. 

https://shuukh.mn/single_case/20673?daterange=2022-03-21%20-%202022-03-21&id=2&court_cat=1&bb=1

 Энэ хураангуй нь шүүхийн шийдвэр биш бөгөөд түүнийг орлохгүй, зөвхөн олон нийтэд  ойлгомжтой байдлаар  мэдээлэн хүргэх зорилготой болно. 

Боловсруулсан:

Нийслэлийн Иргэний хэргийн давж заалдах шатны шүүхийн 

Ерөнхий шүүгч Ж.Оюунтунгалаг