"ТӨРИЙН АЛБАН ХААГЧИЙН ХАНДЛАГЫГ ЗАСАЖ, САЙЖРУУЛАХААР ТУСГАЙ АРГАЧЛАЛ БОЛОВСРУУЛЖ БАЙНА"
"Төрийн албаны зөвлөлийн Шүүхийн ерөнхий зөвлөлийн дэргэдэх салбар зөвлөл болон Төрийн албаны зөвлөлийн хамтын ажиллагаа" сэдэвт уулзалт боллоо. Уулзалтад Шүүхийн ерөнхий зөвлөл, Төрийн албаны зөвлөлийн дарга, гишүүд, Ажлын албаны нэгжийн удирдлагууд оролцож, хамтын ажиллагааг бэхжүүлэх чиглэлээр авч хэрэгжүүлэх арга хэмжээний талаар хэлэлцсэн юм.
Улмаар цогц чадамж бүхий төрийн албан хаагчийг бэлтгэх, тогтвортой, үр ашигтай үйлчилгээг иргэдэд үзүүлэх бодлогыг хэрхэн оновчтой хэрэгжүүлэх талаар санал, мэдээлэл солилцов.
Шүүхийн ерөнхий зөвлөлийн дарга Д.Зүмбэрэллхам “Хууль, шүүхийн салбарт чадварлаг боловсон хүчин шалгаруулж авах, тэднийг сургах, ажлын байрны тогтвортой байдлыг хангах нь амаргүй сорилт. Ялангуяа тухайн албан хаагчаас ажлын үр дүн шаардах хэрээр нийгмийн баталгааг нь мөн хангах ёстойг онцгой анхаарах хэрэгтэй" гэдгийг тодотгон хэлж байв.
Төрийн албан хаагчийн хандлага зан үйлээс шалтгаалсан зөрчил доголдол цөөнгүй гардаг. Үүнийг хэрхэн засаж, сайжруулах талаар тусгай аргачлал боловсруулж буй талаар Төрийн албаны зөвлөлийн дарга Б.Баатарзориг онцлов. Түүнчлэн Төрийн албаны зөвлөлийн цахим системтэй танилцаж, орчин үеийн ухаалаг технологиор шалгалтад оролцогчдод хүндрэл, шударга бус байдал үүсгэхгүйгээр зохион байгуулсан шийдлийг туршиж үзжээ.
Эх сурвалж: Шүүхийн ерөнхий зөвлөл
