БНХАУ-ын Шүүгчдийн үндэсний коллежийн төлөөлөгчид Нийслэлийн Иргэний хэргийн давж заалдах шатны шүүхэд зочлов

• Өчигдөр, 17:26
|
• 53

Нийслэлийн Иргэний хэргийн давж заалдах шатны шүүх Бүгд Найрамдах Хятад Ард Улсын Дээд шүүхийн дэргэдэх Шүүгчдийн үндэсний коллежийн Дэд Ерөнхийлөгч, профессор Ху Тянь тэргүүтэй төлөөлөгчдийг хүлээн авч уулзав.

 Уулзалтад тус шүүхийн Ерөнхий шүүгч Г.Даваадорж, Зохион байгуулалтын хэлтсийн дарга Б.Алтанбагана, мөн БНХАУ-ын талаас Ардын дээд шүүхийн Шүүх хэргийн академийн Судалгааны газрын дарга Шиэ Вэньшөн, Шүүгчдийн үндэсний коллежийн Сургалтын менежментийн газрын дэд дарга Сяо Жэньчи, Шүүгчдийн үндэсний коллежийн Иргэний болон арилжааны хэргийн сургалт, судалгааны газрын дэд дарга, профессор Ян Сяоли, Цахим сургалтын газрын дэд дарга Лью Фан, Өвөр Монгол дахь салбарын захирал Жан Юнгуан нар оролцлоо. 

Ерөнхий шүүгч Г.Даваадорж уулзалтын үеэр хэлсэн үгэндээ, “Манай хоёр орны шүүхийн салбарын олон жилийн найрсаг харилцаа нь бидний ирээдүйн хөгжил, цахим шинэчлэлд чухал нөлөө үзүүлж байгаа” гэдгийг онцоллоо.

Төлөөлөгчид тус шүүхийн бүтэц, зохион байгуулалт, шүүн таслах ажиллагааны талаар мэдээлэл авч, шүүхийн байр, шүүх хуралдааны танхимтай танилцаж, шүүгч, шүүгчийн туслах, нарийн бичгийн дарга нартай уулзаж, давж заалдах шатны шүүх хуралдааны үйл явцтай биечлэн танилцлаа.

Уулзалтын үеэр хоёр тал ирээдүйд тогтвортой хамтын ажиллагааг үргэлжлүүлж, хоёр орны шүүхийн хөгжил, шүүгчдийн сургалтыг улам эрчимжүүлэхээр хамтран ажиллах хүсэл зорилго нэг байгаагаа илэрхийллээ.

Нийслэлийн Иргэний хэргийн давж заалдах шатны шүүхийн Тамгын газар