“ЦАХИМ ШҮҮХ-MOCK TRIAL-2025”

• Өнөөдөр, 09:28
|
• 28

     Монголын Хуульчдын холбооны Ерөнхийлөгчийн нэрэмжит шүүхийн мэтгэлцээний тэмцээний, давж заалдах шатны өрсөлдөөн тус шүүхийн танхимд 2025 оны 6 дугаар сарын 7-ны өдөр амжилттай зохион байгуулагдлаа.

     Ерөнхий шүүгч Г.Даваадорж нь МХХ-ны Иргэний эрх зүйн хорооны тэргүүний хувьд энэхүү “ЦАХИМ ШҮҮХ-MOCK TRIAL-2025” тэмцээнийг санаачилж, уг тэмцээнд хууль зүйн их, дээд сургуулийн оюутнууд маш идэвхитэй оролцжээ. 

     Цахим мэтгэлцээний Анхан шат: Урьдчилан өгсөн цахим хавтаст хэрэг, нотлох баримтуудыг оюутнууд цаасгүй, цахим орчинд шинжлэн судалж, анхан шатны шүүх хуралдаанд, цахим платформ ашиглан онлайнаар оролцов. 

     Цахим мэтгэлцээний Давж заалдах шат: Давж заалдах шатны финалын тоглолтууд шүүх хуралдааны танхимд явагдсан хэдий ч оролцогч багууд мэтгэлцэхдээ огт цаас хэрэглэхгүйгээр нөүтбүүк, таблет, гар утас зэргийг ашигласан байна.  

     Энэхүү цахим мэтгэлцээний тэмцээн нь оюутнуудад бодит туршлага болсноос гадна тэд цахим нотлох баримтыг дижитал орчинд үнэлж, онлайн шүүх хуралдаанд оролцож үзсэн нь оролцогчдын мэдлэг, ур чадварыг хөгжүүлээд зогсохгүй цахим шүүхийн үйл явцад хөл нийлүүлэн алхах анхны суурийг тавьжээ.

     Тэмцээнд оролцогч оюутнуудын зүгээс шүүхийн цахимжилтыг бүрэн дэмжиж байсан бөгөөд тэдний сэтгэлгээний өөрчлөлтөд мэдэгдэхүйц ахиц гарч байсан нь тэмцээний хамгийн том үр дүн байлаа. Зохион байгуулалтын хувьд өндөр түвшинд явагдсан бөгөөд цаашдын бодит ажилд ойр, ур чадварыг хөгжүүлсэн, олон нийтийн анхаарлыг татсан, залуу мэргэжилтнүүдэд итгэл найдвар төрүүлсэн, шүүхийн цахим шинэчлэлд хувь нэмэр оруулсан чухал үйл явдал боллоо.