ХАМТРАН ҮҮРЭГ ГҮЙЦЭТГЭГЧДИЙН ХЭН НЭГ НЬ ТӨЛБӨРИЙН ЧАДВАРГҮЙ БОЛ ТҮҮНД ОНОГДОХ ҮҮРГИЙГ ТӨЛБӨРИЙН ЧАДВАРТАЙ БУСАД ҮҮРЭГ ГҮЙЦЭТГЭГЧИД ХАРИУЦУУЛНА.

• 2025-05-19, 08:46
|
• 140

ХАМТРАН ҮҮРЭГ ГҮЙЦЭТГЭГЧДИЙН ХЭН НЭГ НЬ ТӨЛБӨРИЙН ЧАДВАРГҮЙ БОЛ ТҮҮНД ОНОГДОХ ҮҮРГИЙГ ТӨЛБӨРИЙН ЧАДВАРТАЙ БУСАД ҮҮРЭГ ГҮЙЦЭТГЭГЧИД ХАРИУЦУУЛНА.

Шүүхийн нэр: Нийслэлийн Иргэний хэргийн давж заалдах шатны шүүх

Шийдвэрийн огноо, дугаар: 2024.05.03, 210/МА2024/00938

Тоймын огноо, дугаар:05

Шийдвэрийн төлөв: Хүчин төгөлдөр болсон.

Санамж: Энэхүү тойм нь шүүхийн шийдвэрийг орлохгүй бөгөөд олон нийтийг мэдээллээр хангах зорилготой болно.

Нэхэмжлэгч “Г” ХК нь хариуцагч “Н”, “О” нарт холбогдуулан зээлийн төлбөр 33,801,460 төгрөг гаргуулах тухай нэхэмжлэлийг шүүхэд гаргасан.

Хариуцагч “Н”, “О” нар нь нэхэмжилсэн төлбөрийн тооцоололд маргаагүй ба харин хамтран үүрэг гүйцэтгэгчдийн хүлээх үүргийн хуваарилалтын талаар маргасан. 

Анхан шатны шүүх хариуцагч “Н”, “О” нараас дээрх зээлийн төлбөрийг тэнцүү хэмжээгээр гаргуулан нэхэмжлэгч “Г” ХК-д олгож шийдвэрлэснийг хариуцагч “Н” эс зөвшөөрч давж заалдах гомдол гаргасан. 

Давж заалдах шатны шүүхээс хамтран үүрэг гүйцэтгэгчдийн хэн нэг нь төлбөрийн чадваргүй бол нийт төлбөрийн түүнд оногдох хэсгийг төлбөрийн чадвартай бусад үүрэг гүйцэтгэгчид тэнцүү хуваарилна гэж Иргэний хуульд зааснаар “Н”-д оногдох зээлийн үүргийг хамтран үүрэг гүйцэтгэгч “О”-д хариуцуулсан өөрчлөлтийг анхан шатны шүүхийн шийдвэрт оруулсан. 

Тодруулбал, Эмнэлэг хөдөлмөрийн магадлах комиссын хурлаар “Н”-д бактер судлал ба эд судлалаар батлагдсан амьсгалын эрхтний сүрьеэ оношоор хөдөлмөрийн чадвар алдалтыг 80 хувиар тогтоосон нөхцөл байдал, хэрэгт авагдсан бусад бичгийн баримтаар хариуцагч “Н” нь төлбөрийн чадваргүй болох нь тогтоогдсон тул түүнд оногдох үүргийг төлбөрийн чадвартай үүрэг гүйцэтгэгчид хариуцуулсан болно. 

Шийдвэрийг бүтнээр нь үзэх холбоос: 

https://shuukh.mn/single_case/30456?daterange=2024-05-03%20-%202024-05-03&id=2&court_cat=1&bb=1 

Тойм бэлтгэсэн: 

Нийслэлийн Иргэний хэргийн давж заалдах шатны шүүхийн шүүгч Т.Бадрах