ТАЛУУД ГЭРЭЭНЭЭС ТАТГАЛЗСАНААР ХАРИУЦАГЧИЙН ЭЗЭМШИЛ, АШИГЛАЛТ ДУУСГАВАР БОЛДОГ

• Өнөөдөр, 09:36
|
• 16

ТАЛУУД ГЭРЭЭНЭЭС ТАТГАЛЗСАНААР ХАРИУЦАГЧИЙН ЭЗЭМШИЛ, 

АШИГЛАЛТ ДУУСГАВАР БОЛДОГ 

Шүүхийн нэр: Нийслэлийн Иргэний хэргийн давж заалдах шатны шүүх

Шийдвэрийн огноо, дугаар: 2023.12.22 №210/МА2024/00002

Тоймын дугаар, огноо: 2025.04.09 №4

Шийдвэрийн төлөв: Хүчин төгөлдөр болсон.

Санамж: Энэхүү тойм нь шүүхийн шийдвэрийг орлохгүй бөгөөд олон нийтийг мэдээллээр хангах зорилготой болно. 

Нэхэмжлэгч Б нь орон сууцыг хууль бус эзэмшлээс чөлөөлүүлэх тухай нэхэмжлэл гаргасан.

Хариуцагч О нь дээрх шаардлагыг “... миний өмчлөлийн нэг өрөө орон сууцыг худалдаж мөнгийг нь Б захиран зарцуулсан, мөнгийг буцааж өгөх хүртэл хугацаанд орон сууцанд байлгахаар тохиролцсон тул зөвшөөрөхгүй ...” гэсэн үндэслэлээр эс зөвшөөрч, орон сууц худалдан авахад дүйцэх хэмжээний мөнгө буюу 80,000,000 төгрөг гаргуулах тухай сөрөг нэхэмжлэл гаргаж маргасан.  

Анхан шатны шүүх хариуцагч О-ийн хууль бус эзэмшлээс орон сууц албадан чөлөөлүүлэх тухай нэхэмжлэгч Б-гийн үндсэн нэхэмжлэлийн шаардлагыг бүхэлд нь хэрэгсэхгүй болгож, нэхэмжлэгч Б-ээс 80,000,000 төгрөг гаргуулан хариуцагч О-д олгож шийдвэрлэсэн.

Нэхэмжлэгч Б, түүний өмгөөлөгч нар нь анхан шатны шүүхийн шийдвэрийг эс зөвшөөрч, “...нотлох баримтыг буруу үнэлсэн, хуулийг буруу тайлбарлаж хэрэглэсэн, О нь орон сууцыг худалдах бүх ажиллагаанд өөрөө оролцсон, охин Ж-тайгаа хамт хуйвалдаж миний зөвшөөрөлгүй орон сууцанд орж амьдарсан...” гэсэн үндэслэлээр давж заалдах гомдол гаргасан. 

Маргааны зүйл болох үл хөдлөх эд хөрөнгийн хууль ёсны өмчлөгчөөр Б бүртгэлтэй үйл баримтыг шүүх зөв тогтоосон боловч хариуцагч О-ийн хууль бус эзэмшлээс албадан чөлөөлүүлэх шаардлагыг хэрэгсэхгүй болгож шийдвэрлэсэн нь буруу байгааг давж заалдах шатны шүүхээс залруулж шийдвэрлэсэн болно. 

Тодруулбал, О нь Б-ийн өмчлөлийн орон сууцыг хууль бусаар эзэмшсэн болох нь хэргийн баримтаар тогтоогдсон бөгөөд талууд хэн аль нь харилцан шаардлага гаргаж, гэрээнээс татгалзсан тул хариуцагч О-ийн эзэмшил дуусгавар болно. Иймд нэхэмжлэгч Б нь дээрх орон сууцны өмчлөгчийн хувьд өөрийн өмчлөлийн зүйлээ шаардах эрхтэй тул орон сууцыг хууль бус эзэмшлээс чөлөөлүүлэхээр тогтоосон өөрчлөлтийг шүүхийн шийдвэрт оруулав. 

Харин анхан шатны шүүх хариуцагч О-ийн өмчлөлийн орон сууцыг Б, Ж нар нь худалдан борлуулж мөнгөн хөрөнгийг ашигласан гэж дүгнэж, орон сууц худалдан авахад дүйцэх хэмжээний мөнгө буюу 80,000,000 төгрөгийг нэхэмжлэгчээс гаргуулан хариуцагчид олгож шийдвэрлэсэн шүүхийн дүгнэлт үндэслэлтэй байх тул энэ талаарх нэхэмжлэгч Б-гийн гаргасан давж заалдах гомдлыг хангахгүй орхисон. 

Шүүхийн шийдвэрийг бүтэн эхээр нь үзэх цахим холбоос: 

https://shuukh.mn/single_case/29195?daterange=2022-01-01%20-%202025-03-25&id=2&court_cat=1&bb=1

Тоймыг бэлтгэсэн: Нийслэлийн Иргэний хэргийн давж заалдах шатны шүүхийн шүүгч Д.Цогтсайхан