ҮҮРГИЙН ШИНЖ ЧАНАРТ ХАРШЛАХГҮЙ БОЛ ҮҮРГИЙГ ГУРАВДАГЧ ЭТГЭЭДЭЭР ГҮЙЦЭТГҮҮЛЖ БОЛНО

• 2025-03-19, 15:06
|
• 59

Шүүхийн нэр: Нийслэлийн Иргэний хэргийн давж заалдах шатны шүүх

Шийдвэрийн огноо, дугаар: 2025.01.22 №210/МА2025/00166

Тоймын дугаар, огноо: 2025.03.20 №3

Шийдвэрийн төлөв: Хүчин төгөлдөр болоогүй.

Санамж: Энэхүү тойм нь шүүхийн шийдвэрийг орлохгүй бөгөөд олон нийтийг мэдээллээр хангах зорилготой болно. 

Нэхэмжлэгч Т. нь зээлийн гэрээний үүрэгт 107,458,718 төгрөг гаргуулах тухай нэхэмжлэл гаргасан.

Хариуцагч Ц. нь дээрх шаардлагыг “...нэхэмжлэгч Т.-гээс мөнгө хүлээн аваагүй учир зээлийн гэрээ байгуулагдаагүй...” гэсэн үндэслэлээр эс зөвшөөрч, хэлцлийн дагуу шилжүүлсэн 13,744,289 төгрөгийг буцаан гаргуулах тухай сөрөг нэхэмжлэл гаргаж маргасан.  

Анхан шатны шүүх хариуцагч Ц.-гээс 76,014,943 төгрөг гаргуулан нэхэмжлэгч Т.-д олгож, нэхэмжлэгч Т.-гээс 13,744,289 төгрөг буцаан гаргуулах тухай хариуцагч Ц.-гийн сөрөг нэхэмжлэлийг хэрэгсэхгүй болгож шийдвэрлэсэн.

Хариуцагч Ц. нь анхан шатны шүүхийн шийдвэрийг эс зөвшөөрч, “...нэхэмжлэгч Т. нь мөнгийг Ц.-д бодитоор шилжүүлэн өгөөгүй учир талуудын хооронд зээлийн гэрээ байгуулагдсан гэж үзэхгүй, улмаар нэхэмжлэгч Т. нь зээлийн гэрээний үүрэг шаардах эрхгүй...” гэсэн үндэслэлээр давж заалдах гомдол гаргасан. 

Давж заалдах шатны шүүх нэхэмжлэгч Т. нь гуравдагч этгээд “С” ХХК-аар зээлийн мөнгийг зээлдэгч Ц.-д шилжүүлэх үүргийг гүйцэтгүүлсэн нь Иргэний хуулийн 210 дугаар зүйлийн 210.1-д “...үүргийн шинж чанарт харшлахгүй бол үүргийг гуравдагч этгээдээр гүйцэтгүүлж болно” гэж заасантай нийцсэн гэж дүгнэн анхан шатны шүүхийн шийдвэрийг хэвээр үлдээж, хариуцагч Ц.-гийн гаргасан давж заалдах гомдлыг хангахгүй орхисон. 

Шүүхийн шийдвэрийг бүтэн эхээр нь үзэх цахим холбоос: 

https://shuukh.mn/single_case/32746?daterange=2025-01-20%20-%202025-01-22&id=2&court_cat=1&bb=1

Тоймыг бэлтгэсэн: Нийслэлийн Иргэний хэргийн давж заалдах шатны шүүхийн шүүгч Д.Нямбазар