Худалдагч худалдсан зүйлээ өөр этгээдэд үнэ нэмж худалдсаныг худалдан авагчийн хохиролд тооцов

• 2025-02-14, 16:40
|
• 76

Шүүхийн нэр: Нийслэлийн Иргэний хэргийн давж заалдах шатны шүүх

Шийдвэрийн огноо, дугаар: 2024.07.29 №210/МА2024/01541

Тоймын дугаар, огноо: 2025.02.14. №2 

Шийдвэрийн төлөв: Хүчин төгөлдөр болсон.

Санамж: Энэхүү тойм нь шүүхийн шийдвэрийг орлохгүй бөгөөд олон нийтийг мэдээллээр хангах зорилготой болно.

“Ж” ХХК нь 2023.10.09-ний өдөр “Э” ХХК-тай худалдах, худалдан авах тухай гэрээ байгуулж 350,000,000 төгрөгөөр тоног төхөөрөмж худалдан авахаар тохиролцсон бөгөөд урьдчилгаа 295,000,000 төгрөгийг төлж, үлдэгдэл 55,000,000 төгрөгийг банк хоорондын гүйлгээний саатлын улмаас ялимгүй хоцроож төлсөн. Гэтэл “Э” ХХК нь уг тоног төхөөрөмжийг “С” ХХК-д 360,000,000 төгрөгөөр худалдсан байсан. Үүнээс болж бид олох ёстой байсан орлого 165,000,000 төгрөг болон тухайн тоног төхөөрөмжтэй адил зүйлийг бусдаас худалдан авахад нэмж 185,000,000 төгрөг төлөхөөр байх тул хариуцагч нараас хохиролд 350,000,000 төгрөгийг гаргуулахаар нэхэмжилсэн. 

Хариуцагч “Э” ХХК нь “төлбөрийг бүрэн төлөөгүй тул манай компани гэрээнээс татгалзаж, “Ж” ХХК-ийн төлсөн мөнгийг буцаан өгсөн. Гэрээнээс татгалзсан явдалд нэхэмжлэгч нь өөрөө буруутай тул хохирол шаардах эрхгүй. Түүнчлэн нэхэмжлэгчийн олох байсан орлого гэх 165,000,000 төгрөгийг зайлшгүй олох байсан орлого гэж үзэх үндэслэлгүй” гэж маргасан.

Харин хариуцагч “С” ХХК нь “...“Э” ХХК-тай 2023.10.14-ний өдөр тоног төхөөрөмж худалдах худалдан авах тухай гэрээ байгуулж, тус тоног төхөөрөмжийн үнийг бүрэн төлж авсан бөгөөд хууль зөрчөөгүй” гэжээ.

Анхан шатын шүүх хариуцагч “Э” ХХК-иас 10,000,000 төгрөг гаргуулж “Ж” ХХК-д олгож, нэхэмжлэлээс үлдэх 340,000,000 төгрөгийг болон хариуцагч “С” ХХК-д холбогдох хэргийг тус тус хэрэгсэхгүй болгож шийдвэрлэсэн.

Давж заалдах шатны шүүх зохигчдын байгуулсан худалдах, худалдан авах гэрээгээр худалдагч “Э” ХХК нь дэнчин 200,000,000 төгрөг төлөгдсөн тохиолдолд 2023.10.13-ны өдөр гэрээний зүйлийг худалдан авагч “Ж” ХХК-нд хүлээлгэн өгөх үүрэг хүлээсэн байна.

Тодруулбал, талууд гэрээний төлбөрийг 100 хувь төлөгдсөн тохиолдолд тоног төхөөрөмжийг хүлээлцэнэ гэж тохиролцоогүй. Иймээс худалдагч “Э” ХХК нь худалдан авагч “Ж” ХХК-ийг дэнчин 200,000,000 төгрөгийг 2023.10.10-ны өдөр төлсөн байхад гэрээний зүйлийг “С” ХХК-д худалдсан нь үүргээ зөрчсөнд тооцно.

Мөн тус гэрээгээр худалдагч “Э” ХХК нь худалдан авагч “Ж” ХХК-д гэрээний зүйлийг хүлээлгэн өгөх боломжтой болсон тухай мэдэгдсэн өдрөөс хойш худалдан авагч нь ажлын 3 хоногийн дотор төлбөрийг бүрэн төлж, тоног төхөөрөмжийг хүлээн авах үүрэгтэй гэж тохирсны дагуу тоног төхөөрөмжийг хүлээн авах тухай мэдэгдсэн 2023.10.13-ны өдрөөс хойш ажлын 3 хоногийн дотор буюу 2023.10.14-ний өдөр үлдэх 150,000,000 төгрөгийг төлсөн байх тул худалдан авагч талыг үүргээ зөрчсөн гэж үзэхгүй, харин энэ тохиолдолд худалдагч “Э” ХХК-ийн буруутай үйлдлээс гэрээ цуцлагдсан байна.

Иймд, худалдагч “Э” ХХК нь худалдан авагч “Ж” ХХК-д хүлээлгэн өгөх ёстой байсан тоног төхөөрөмжийг “С” ХХК-д зах зээлийн үнийг 360,000,000 төгрөгөөр тохирч худалдсан, худалдан авагч “Ж” ХХК нь тухайн тоног төхөөрөмжийг худалдан авахад 10,000,000 төгрөгийн зардал нэмж гаргахаар байх тул үүнийг худалдан авагчид учирсан хохиролд тооцно.

Харин нэхэмжлэлийн шаардлагаас олох байсан орлого 165,000,000 төгрөг нотлогдоогүй тул шаардах эрхгүй гэж үзэж анхан шатны шүүхийн шийдвэрийг хэвээр үлдээж шийдвэрлэв.

Шүүхийн шийдвэрийг бүтэн эхээр нь үзэх цахим холбоос: https://shuukh.mn/single_case/31032?daterange=2024-07-29%20-%202024-07-29&id=2&court_cat=1&bb=1

Тоймыг бэлтгэсэн: Нийслэлийн Иргэний хэргийн давж заалдах шатны шүүхийн шүүгч Б.Мандалбаяр