Г. ДАВААДОРЖ ТЭРГҮҮНТЭЙ ИРГЭНИЙ ЭРХ ЗҮЙН ХОРОО 2024 ОНЫ ШИЛДЭГ ХОРООГООР ШАЛГАРЛАА
Оны шилдэг хуульчдыг шалгаруулах “Фемида-2024” ёслолын ажиллагаа 2024 оны 12 дугаар сарын 24-ний өдөр болж, хүний эрх, эрх чөлөөг хамгаалах, хууль дээдлэх, шударга ёсыг бэхжүүлэх үүргээ нэртэй төртэй гүйцэтгэж, хуульчийн мэргэжлийн үүрэг, ёс зүй, нэр хүндийг өндөрт өргөж, бусдадаа үлгэр дуурайлал болон манлайлж, 2024 оны ажлын үзүүлэлтээр тэргүүлсэн хуульчид шилдгээр тодорлоо.
Ерөнхий шүүгч Г.Даваадорж нь Иргэний эрх зүйн хорооны тэргүүнээр ажилладаг бөгөөд тус хороо нь 2024 оны “Шилдэг хороо”-гоор шалгарсан байна.
Иргэний эрх зүйн хороо нь нийт 1234 гишүүнтэй бөгөөд хамгийн олон гишүүнтэй сайн дурын хороодын нэг билээ. Иргэний эрх зүйн хороо 2024 онд хэрэгжүүлэхээр төлөвлөсөн ажлуудаа бүрэн хэрэгжүүлснээс онцлон дурьдвал:
- “Хувийн эрх зүйн хөгжилд хуульчдын оролцоо” сэдэвт уулзалт, хэлэлцүүлгийг Хууль зүйн Их, Дээд сургуулийн Хувийн эрх зүйн тэнхэмийн багш, Судлаачдын дунд зохион байгуулсан ба Иргэний эрх зүйн хорооны үйл ажиллагаа нь Хувийн эрх зүйн цаашдын хөгжилд гүйцэтгэх чиг үүргийн талаар нээлттэй санал бодлоо хуваалцсан байна.
- “Арилжааны хууль”, “Гэр бүлийн тухай хууль”, Монгол Улс ба БНСУ-н туршлага” зэрэг олон удаагийн хэлэлцүүлгийг хуульчдын дунд,
- “Үнэт цаасны зах зээлийн өнөөгийн байдал, чиг хандлага” сэдвээр оюутны эрдэм шинжилгээний илтгэлийн уралдааныг тус тус зохион байгуулжээ.
- АНУ-ын ЭСЯ-тай хамтран “US speaker” хөтөлбөрийг “Шүүх эрх мэдлийн байгууллагуудын Цахимжилт” сэдвийн хүрээнд амжилттай хэрэгжүүлсэн. Уг хөтөлбөрийн хүрээнд АНУ-ын Аризона мужийн Дээд шүүхийн Ерөнхий шүүгч Роберт М.Брютинел, Шүүхийн захиргааны албаны захирал Дэйв Байерс нар “Цахимжилт ба “БАР”-ын холбоо”, “Дижитал шилжилт ба Өмгөөлөгч”, “Шүүхийн үйлчилгээний хүртээмж ба цахимжилт”, “Сахилгын хэрэг шалгах ажиллагааг цахимжуулах нь”, “Шүүхийн цахимжилт ба тулгамдсан асуудал”, “Цахим нотлох баримтыг цуглуулах, шалгах, бэхжүүлэх, үнэлэх”, “Прокурорын байгууллагын цахимжилт” зэрэг сэдвээр Монголын Хуульчдын Холбооны гишүүн, хуульчидтай уулзаж, туршлагаасаа хуваалцсан.
- “Хуульчдын цом – 2024” Спортын наадамд Багийн дүнгээр 3 дугаар байр эзэлжээ.
Эх сурвалж: https://www.mglbar.mn/
