ГЭР БҮЛИЙН МАРГААНТАЙ ХЭРГИЙГ ШИЙДВЭРЛЭХ ЖУРАМ ЗӨРЧСӨН ТАЛААР
Шүүхийн нэр: Нийслэлийн Иргэний хэргийн давж заалдах шатны шүүх
Шийдвэрийн огноо, дугаар: 2024.07.19 № 210/МА2024/001436
Тоймын дугаар, огноо: 2024.12.25 №12
Шийдвэрийн төлөв: хүчин төгөлдөр болсон
Санамж: Энэхүү тойм нь шүүхийн шийдвэрийг орлохгүй бөгөөд олон нийтийг мэдээллээр хангах зорилготой болно.
Иргэн А /нөхөр/ нь иргэн Б /эхнэр/-д холбогдуулан гэрлэлт цуцлуулах тухай нэхэмжлэл гаргахдаа тэдний дундаас төрсөн 3 хүүхэд насанд хүрээгүй гэж тайлбарлажээ. Хариуцагч Б нь “нэхэмжлэлтэй танилцлаа, сөрөг нэхэмжлэл гаргана” гэснээс өөр тайлбар гаргаагүй байна. Хариуцагч Б анхан шатны шүүхэд гаргасан сөрөг нэхэмжлэлээр хүүхдүүдийн асрамж, тэтгэлэг тогтоолгож, зардал болон гэр бүлийн гишүүдийн дундаа хамтран өмчлөх эд хөрөнгийг хуваалгах шаардлагыг гаргасан боловч шүүх уг сөрөг нэхэмжлэлийг хүлээн авахаас татгалзсан атлаа шийдвэртээ А болон Б нарын гэрлэлтийг цуцалж, 3 хүүхдийг хариуцагчийн асрамжид үлдээж, нэхэмжлэгч А-аас хүүхдүүдэд тэтгэлэг гаргуулж, гэр бүлийн гишүүдийн дундаа хамтран өмчлөх эд хөрөнгийг жич шийдвэрлүүлэх эрхтэйг дурьджээ.
Давж заалдах шатны шүүхээс анхан шатны шүүхийг хэрэг хянан шийдвэрлэх ажиллагааг алдаатай явуулсан гэж дүгнэж шийдвэрийг хүчингүй болгож хэргийг дахин шийдвэрлүүлэхээр буцаасан.
Давж заалдах шатны шүүхээс дүгнэхдээ анхан шатны шүүх нэхэмжлэлийг хариуцагчийн итгэмжлэгдсэн төлөөлөгчид гардуулж өгөхдөө тайлбар гаргах хугацааг 9 хоногоор тогтоосон нь хуульд заасан 14 хоногийн дотор тайлбар гаргах боломжийг хязгаарласан; хариуцагчийн гаргасан сөрөг нэхэмжлэлийг хүлээн авахаас татгалзсан үндэслэлийг “нэхэмжлэлийн бүрдүүлбэр хангагдаагүй” гэж дүгнэсэн бол захирамжид дурдсан алдааг залруулах боломжийг хариуцагч талд олгоогүй; сөрөг нэхэмжлэлийг хүлээн авахаас татгалзсан атлаа хүүхдүүдийн асрамж тогтоолгох, тэтгэлэг гаргуулах асуудлыг гэрлэлт цуцлуулах тухай үндсэн нэхэмжлэлтэй хамт шийдвэрлэсэн, ийнхүү шийдвэрлэхдээ гэрлэгчдээс тайлбар авах, мэтгэлцүүлэх ажиллагаа явуулаагүй гэжээ.
Жич: гэр бүлийн холбогдолтой маргаан тул шийдвэрийг бүтнээр харах боломжгүй.
Тойм бичсэн: Нийслэлийн Иргэний хэргийн давж заалдах шатны шүүхийн шүүгч Э.Золзаяа
