Ажлаас үндэслэлгүйгээр халагдсан тухай гомдлыг хуульд заасан хугацааны дотор харьяалах шүүхэд гаргах эрхтэй

• 2024-10-23, 10:33
|
• 307

Шүүхийн нэр: Нийслэлийн Иргэний хэргийн давж заалдах шатны шүүх.

Шийдвэрийн огноо, дугаар: 2024.04.29 №210/МА2024/00905

Тоймын дугаар, огноо: 2024.10.21. №10

Шийдвэрийн төлөв: Хүчин төгөлдөр болсон. 

Санамж: Энэхүү тойм нь шүүхийн шийдвэрийг орлохгүй бөгөөд олон нийтийг мэдээллээр хангах зорилготой болно.

Нэхэмжлэгч Н, хариуцагч М хуулийн этгээдэд холбогдуулан ажилд эгүүлэн тогтоолгох тухай нэхэмжлэл гаргажээ.
Нэхэмжлэгч нь хариуцагчийн 2021 оны 09 дүгээр сарын 21-ний өдрийн 30 дугаар тогтоолоор ажлаасаа чөлөөлөгдсөн байх ба ажил олгогчийн уг шийдвэрийг эс зөвшөөрч ажилд эгүүлэн тогтоолгох тухай нэхэмжлэлээ Нийслэл дэх Захиргааны хэргийн анхан шатны шүүхэд гаргасныг тус шүүх 2022 оны 08 дугаар сарын 29-ний өдрийн захирамжаар харьяаллын бус нэхэмжлэл гэсэн үндэслэлээр нэхэмжлэлийг хүлээн авахаас татгалзсан байна.
Үүний дараа нэхэмжлэгч нь хариуцагчийн оршин байгаа дүүргийн анхан шатны шүүхэд 2022 оны 11 дүгээр сарын 07-ны өдөр дээрх нэхэмжлэлийг гаргажээ.
1999 оны Хөдөлмөрийн тухай хуулийн 129 дүгээр зүйлийн 129.2 дахь хэсэгт “Ажилтан ажлаас буруу халсан буюу өөр ажилд буруу шилжүүлсэн тухай гомдлоо ажил олгогчийн шийдвэрийг хүлээн авсан өдрөөс хойш нэг сарын дотор шүүхэд гаргана” гэж заасан.
Тодруулбал, нэхэмжлэгч нь хариуцагчийн 2021 оны 09 дүгээр сарын 21-ний өдрийн 30 дугаар тогтоолыг эс зөвшөөрсөн гомдлоо 2021 оны 10 дугаар сарын 21-ний өдрийн дотор шүүхэд гомдлоо гаргах байсан гэж үзнэ.
Нийслэл дэх Захиргааны хэргийн анхан шатны шүүхэд 2022 оны 08 дугаар сард нэхэмжлэлээ гаргасан нь 1999 оны Хөдөлмөрийн тухай хуулийн 129 дүгээр зүйлийн 129.2 дахь хэсэгт заасны дагуу ажил олгогчийн шийдвэрийг гардан авснаас хойш 1 сарын хугацаанд шүүхэд гомдлоо гаргах хугацааг хэтрүүлжээ. 
Нэхэмжлэгч дээрх хуульд заасан хугацааг хэрхэн, яагаад хэтрүүлсэн болох, түүнчлэн хүндэтгэн үзэх шалтгаан байсан эсэх талаарх баримтаа шүүхэд ирүүлээгүй, улмаар Иргэний хэрэг шүүхэд хянан шийдвэрлэх тухай хуулийн 25 дугаар зүйлийн 25.2.2, 38 дугаар зүйлийн 38.1 дэх хэсэгт зааснаар нотлох үүргээ хэрэгжүүлээгүй байна.
Иймд дээрх үндэслэлээр нэхэмжлэгч талын гаргасан давж заалдах гомдлыг хангахгүй орхисон байна.

Шүүхийн шийдвэрийг бүтнээр харах цахим холбоос: 
https://shuukh.mn/single_case/30163?daterange=2024-01-01%20-%202024-10-21&id=2&court_cat=1&bb=1 
Тойм бэлтгэсэн: Нийслэлийн Иргэний хэргийн давж заалдах шатны шүүхийн шүүгч Ц.Алтанцэцэг.