ӨНДӨР НАСНЫ ТЭТГЭВРЭЭ ТОГТООЛГОСОН АЖИЛТАНТАЙ ХӨДӨЛМӨРИЙН ГЭРЭЭ БАЙГУУЛАХ ҮҮРГИЙГ АЖИЛ ОЛГОГЧ ХҮЛЭЭХГҮЙ

• 2024-09-30, 16:19
|
• 372

Шүүхийн нэр: Нийслэлийн Иргэний хэргийн давж заалдах шатны шүүх

Шийдвэрийн огноо, дугаар: 2023.07.21, 210/МА2023/01440

Тоймын огноо, дугаар: 2024.09.27 №9 

Шийдвэрийн төлөв: Хүчин төгөлдөр болсон

Санамж: Энэхүү тойм нь шүүхийн шийдвэрийг орлохгүй бөгөөд олон нийтийг мэдээллээр хангах зорилготой болно.

Нэхэмжлэгч У нь хариуцагч Т-д холбогдуулан урьд эрхэлж байсан ажил, албан тушаалд эгүүлэн тогтоолгох, цалин гаргуулах тухай нэхэмжлэлийг шүүхэд гаргасан.

Нэхэмжлэгч У нь шаардлагын үндэслэлээ “... миний бие өндөр насны тэтгэврээ тогтоолгосон боловч гэрээгээр үргэлжлүүлэн ажилласан, ажил олгогч нь байнгын ажлын байранд хугацаатай гэрээ байгуулсан нь буруу ...” гэсэн агуулгаар тайлбарласан бол хариуцагч Т нь татгалзлын үндэслэлээ “... өндөр насны тэтгэврээ тогтоолгосон ажилтан У-тай түүний хүсэлтийг үндэслэн хөлсөөр ажиллах гэрээг хугацаатай байгуулсан” гэж тайлбарлан маргасан байна.

Анхан шатны шүүх нэхэмжлэгч У-гийн нэхэмжлэлийн шаардлагыг хангаж, түүнийг урьд эрхэлж байсан ажил, албан тушаалд эгүүлэн тогтоож, цалин гаргуулж шийдвэрлэснийг хариуцагч Т эс зөвшөөрч давж заалдах гомдол гаргасан. 

Давж заалдах шатны шүүхээс ажилтан У нь хуульд заасны дагуу нэг удаагийн мөнгөн тэтгэмж авч, өндөр насны тэтгэврээ тогтоолгосон тул ажил олгогч Т нь ажилтан У-тай хөдөлмөрийн гэрээ байгуулах үүрэг хүлээхгүй гэж дүгнэн хариуцагч Т-гийн гаргасан давж заалдах гомдлыг хангаж, анхан шатны шүүхийн шийдвэрийг хүчингүй болгож, нэхэмжлэгч У-гийн нэхэмжлэлийг хэрэгсэхгүй болгож шийдвэрлэсэн.

Тодруулбал, “хариуцагч байгууллага ажилтан У-тай хөлсөөр ажиллах гэрээ байгуулсан нь үндэслэлгүй, хөдөлмөрийн гэрээ байгуулах ёстой байсан” гэсэн агуулгатай анхан шатны шүүхийн дүгнэлтийг 1994 оны Нийгмийн даатгалын сангаас олгох тэтгэвэр, тэтгэмжийн тухай хуулийн 4¹ дүгээр зүйлд заасантай нийцэхгүй гэж давж заалдах шатны шүүхээс үзсэн байна. 

Шийдвэрийг бүтнээр нь үзэх холбоос: https://shuukh.mn/single_case/28103?daterange=2023-01-01%20-%202023-12-12&id=2&court_cat=1&bb=1  

            Тойм бэлтгэсэн: Нийслэлийн Иргэний хэргийн давж заалдах шатны шүүхийн шүүгч М.Баясгалан