ЭМГЭНЭЛ

• 2024-09-23, 17:13
|
• 1 473

Нийслэлийн Иргэний хэргийн давж заалдах шатны шүүхийн шүүгч Ж.Оюунтунгалаг 2024 оны 09 дүгээр сарын 23-ны өдөр өвчний улмаас таалал төгсөж, бидэнд нөхөж баршгүй гарз тохиолоо.

Ж.Оюунтунгалаг нь 1978 онд Улаанбаатар хотод төрж, 1993-1996 онд “Цог” гадаад хэлний дээд сургуулийг орчуулагч, 1996-2001 онд ОХУ-ын Эрхүүгийн Техникийн их сургуулийн хуулийн ангийг эрх зүйн мэргэжлээр тус тус төгсөж, 2001-2002 онд МУИС-Хууль зүйн сургуульд магистр, Япон Улсын Нагояагийн их сургуульд 2005-2007 онд магистр, 2007-2010 онд хууль зүйн доктор (LL.D), дэд профессорын зэрэг хамгаалжээ.      

Ж.Оюунтунгалаг нь 2001-2012 онд Хууль зүй, дотоод хэргийн яаманд мэргэжилтэн, 2012-2013 онд Нийслэлийн шүүхийн шүүгч, 2013-2015 онд Иргэний хэргийн давж заалдах шатны 10 дугаар шүүхийн шүүгч, 2015.06.30-2016.02.05 хүртэл Нийслэлийн Иргэний хэргийн давж заалдах шатны шүүхийн шүүгч, 2016.02.05-2023.08.08 хүртэл Нийслэлийн Иргэний хэргийн давж заалдах шатны шүүхийн Ерөнхий шүүгч, 2023 оны 08 дугаар сарын 08-ны өдрөөс Нийслэлийн Иргэний хэргийн давж заалдах шатны шүүхийн шүүгчээр ажилласан юм. 

Тэрээр шүүн таслах ажил эрхлэхийн зэрэгцээ 2020 онд Монголын Шүүгчдийн холбооны тэргүүнээр сонгогдсон бөгөөд шүүхийн бие даасан, шүүгчийн хараат бус байдлыг бэхжүүлэх түүнчлэн иргэний эрх зүйн хөгжилд үнэтэй хувь нэмэр оруулж, өөрийн мэдлэг, авьяас чадвараа дайчлан ажилласан билээ.     

Хууль зүйн доктор (LL.D), дэд профессор, шүүгч Ж.Оюунтунгалаг нь төрийн байгууллагад тасралтгүй 22 жил, үүнээс шүүгчээр 11 жил ажиллахдаа иргэн, эдийн засаг, бизнесийн болон харьцуулсан эрх зүйн чиглэлээр сургалт, судалгааны ажлыг эрхэлж, 30 орчим сурах бичиг, ном, гарын авлага, нийтлэл, судалгааны өгүүлэл, илтгэлийг монгол болон гадаад хэл дээр хэвлүүлсэн байна. 

Ж.Оюунтунгалагийн шударга, зарчимч, хүнлэг, бүтээлч, хөдөлмөрч хичээнгүй, элэгсэг дотно дүр төрх бидний зүрх сэтгэлд үүрд хоногшин үлдэх болно.   

Талийгаачийн гэр бүл, үр хүүхэд, төрөл төрөгсдөд гүн эмгэнэл илэрхийлье.