ХОХИРОГЧ ЭМЧИЛГЭЭНИЙ ЗАЙЛШГҮЙ ЗАРДЛЫГ УРЬДЧИЛАН ТӨЛҮҮЛЭХЭЭР ШААРДАХ ЭРХТЭЙ

• 2024-07-31, 14:56
|
• 455

Нийслэлийн Иргэний хэргийн давж заалдах шатны шүүхийн 2024 оны 01 дүгээр сарын 12-ны өдрийн 112 дугаар магадлал 

Тоймын дугаар, огноо: 2024.07.31 №7

Шийдвэрийн төлөв: Хүчин төгөлдөр болсон.

Санамж: “Энэхүү тойм нь шүүхийн шийдвэрийг орлохгүй бөгөөд олон нийтийг мэдээллээр хангах зорилготой болно.”

Нэхэмжлэгч Ч.М нь “С” ХХК, А.Б нарт холбогдуулан хүү М.Г-ын эрүүл мэндэд учирсан гэм хорын хохиролд 680,087,356 төгрөг гаргуулахаар шүүхэд нэхэмжлэл гаргажээ.  

Хариуцагч “С” ХХК, А.Б нар “…тархинд шунт тавих мэс ажилбарыг Монгол Улсад хийх боломжтой, эмчилгээний зардлыг бодитоор гаргаагүй, зайлшгүй зардал гэж үзэх боломжгүй … , А.Б нь хариуцагч биш …” гэх үндэслэл тус тус заан маргасан.

Анхан шатны шүүх ажиллагсад хөдөлмөрийн гэрээ буюу албан тушаалын дагуу хүлээсэн үүргээ гүйцэтгэх явцад гэм буруутай үйлдэл, эс үйлдэхүйгээр бусдад учруулсан гэм хорын хариуцлагыг түүний ажиллуулж байгаа ажил олгогч хүлээх тул “С” ХХК нэхэмжлэгчид учирсан хохирлыг хариуцан арилгах үүрэгтэй гэж дүгнэн хариуцагч А.Б-д холбогдох нэхэмжлэлийг хэрэгсэхгүй болгон, эмчилгээний зардал, цалин, асаргааны тэтгэмжийн зөрүүд нийт 35,173,213 төгрөгийг хариуцагч “С” ХХК-аас гаргуулан нэхэмжлэгч Ч.М-д олгож, нэхэмжлэлээс үлдэх 659,073,303 төгрөгт холбогдох хэсгийг хэрэгсэхгүй болгож шийдвэрлэжээ. 

Тэрээр нэхэмжлэгчийн нэхэмжлэлийн шаардлагаас Солонгос улсад эмчлүүлэх эмчилгээний зардал 650,980,000 төгрөгт холбогдох хэсгийг хэрэгсэхгүй болгож шийдвэрлэхдээ “М.Г нь зайлшгүй гадаад улсад эмчлүүлэх шаардлагатай талаарх үйл баримт хэргийн баримтаар хангалттай тогтоогдоогүй, Монгол Улсад эмчлэх боломжгүй өвчний жагсаалтад М.Г-ын өвчний онош хамрагдаагүй, гадаад улсад зайлшгүй эмчлүүлэх шаардлагатай гэсэн эмнэлгийн дүгнэлт гараагүй” гэж дүгнэсэн байна.

Иргэний хуулийн 228 дугаар зүйлийн 228.4 дэх хэсэгт зааснаар хохирогч нь эмчилгээний зайлшгүй зардлыг урьдчилан төлүүлэхээр гэм хорыг арилгах үүрэг бүхий этгээдээс шаардах эрхтэй. 

Давж заалдах шатны шүүхээс хэрэгт цугларсан нотлох баримтуудыг үндэслэн нэхэмжлэгч талын гадаад улсад мэс засал хийлгэх эмчилгээний зардал нэхэмжилсэн шаардлагыг 203,760,000 төгрөгийн хэмжээнд хангаж, хариуцагч “С” ХХК-аас эрүүл мэндэд учирсан гэм хорын хохиролд нийт 238,993,213 төгрөг гаргуулж, нэхэмжлэгч Ч.М-д олгохоор анхан шатны шүүхийн шийдвэрт өөрчлөлт оруулсан болно. 

Шийдвэрийг бүтнээр харах цахим холбоос: https://shuukh.mn/case_davah_engine/29657

Тойм бэлтгэсэн: Нийслэлийн Иргэний хэргийн давж заалдах шатны шүүхийн шүүгч Ч.Цэнд