Хууль ёсоор орон сууцанд амьдарч байгаа этгээдийг тухайн хөрөнгийн өмчлөгчөөр тогтоох боломжтой

• 2024-04-15, 11:54
|
• 438

Шүүхийн нэр, шийдвэрийн дугаар: Нийслэлийн Иргэний хэргийн давж заалдах шатны шүүхийн 2023 оны 12 дугаар сарын 27-ны өдрийн 210/ШМ2024/002059 дугаар магадлал.

Тоймын дугаар, огноо: 2024.04.15 №4

Шийдвэрийн төлөв: Хүчин төгөлдөр болсон 

Санамж: Энэхүү тойм нь шүүхийн шийдвэрийг орлохгүй бөгөөд олон нийтийг мэдээллээр хангах зорилготой болно.

            Иргэн Л.С нь Чингэлтэй дүүрэг, 6 дугаар хороо, бага тойруу гудамж, 44 дүгээр байрны 3 өрөө, өөрийн өмчлөлийн орон сууцнаас иргэн Б.Б-ыг нүүлгэн гаргуулахаар нэхэмжлэл гаргасныг хариуцагч эс зөвшөөрч төлбөр барагдуулах тухай хэлцлийг хүчин төгөлдөр бусд тооцуулах, үл хөдлөх эд хөрөнгийн өмчлөх эрхийг шилжүүлж өгөхийг даалгах тухай сөрөг нэхэмжлэл гаргасан байна. Анхан шатны шүүх маргалдагч талуудын хэн алины нэхэмжлэлийг хэрэгсэхгүй болгож шийдвэрлэжээ. 

            Давж заалдах шатны шүүх маргалдагч талуудын хэн алины гаргасан гомдлоор хэргийг хянаад Л.С нь бэлэглэлийн гэрээгээр маргаан бүхий орон сууцыг Б.Б-ын эзэмшилд хариу төлбөргүйгээр шилжүүлсэн нь тогтоогдсон тул Иргэний хуулийн 90 дүгээр зүйлийн 90.1 дэх хэсэгт “хөрөнгийг хууль ёсоор эзэмшиж байгаа буюу түүнийг эзэмших эрхтэй болох нь тодорхой байгаа этгээдийг шударга эзэмшигч” гэж заасны дагуу Б.Б-ыг орон сууцны өмчлөгчөөр тогтоосон өөрчлөлтийг шүүхийн шийдвэрт оруулав. 

Шүүхээс иргэн Б.Б-ыг орон сууцны өмчлөгчөөр тогтоож шийдвэрлэсэн тул орон сууцнаас нүүлгэн гаргуулах талаар гаргасан нэхэмжлэгч Л.С-ийн давж заалдах гомдлыг хангахгүй орхиж шийдвэрлэсэн болно. 

Шийдвэрийг бүтнээр харах цахим холбоос:

https://shuukh.mn/single_case/28641?daterange=2023-01-01%20-%202024-04-12&id=2&court_cat=1&bb=1

Тоймыг бэлтгэсэн: Нийслэлийн Иргэний хэргийн давж заалдах шатны шүүхийн шүүгч Д.Цогтсайхан